Luke 2

1Iyane, do holoŋitek innafa, aŋawoŋ hiro tere Kesare Agusto efahini inyie hifahi ne hitigioro no fureita inno huwo illa lamanya da fau ho Roma. 2Ara ifa inna hitieri no higioro no fureta nafa owuanari Kurinno a mamur lo Siria. 3Ette huwo daŋ ta massiok innohose ŋaifie aborejin ha gala innohose hetigiorohini fureta innohosie.

4Ellaŋ hidofe Yosefu to bore gala no Nasaret nyie ta Galileya ette ewate abore gala ho Yudeya no Bettelehm, ne oyien huw hijo doŋe no Davide, nyo ottu ifa inyeja tere woyo ba Davide. 5Ohu ifa inneyja ade hetigiorohini iko Mariya nafa esaŋa inyeja hidofe etila hito.

6Niya nafa halarrasa isieja de, aŋawoŋ hati holoŋ hisiori lodole lohonyie. 7Ette inyeja ŋesiu hito olewa lodole loŋieu, ette elurok boŋo do honyie. Ette inyeja efiyak hito do hotuai ho togoli ne letimetteri huwo hanyahanya, nyo obe ifa mai do hose da haji na hettemonok.

8Da mai nyie owuon ifa ilamuk heyohok illo kioro illafa amanya oriŋa kioro innohosei ta tari. 9Kwak, ette anjillo la Habu hiduoŋ do hose, ojo lohuo na Habu no opipiak ette elurok daŋ isieja, ette isieja baŋi binno.

10Niya ette anjillo hijo do hose, “Ibaŋa labaŋ, nyo awak iso naŋ elimak sayye inna lanyar inne leyani munoi do huwo daŋ. 11Ena esiuni Hetalahani da hatai do bore ha gala no Davide! Ara inyie Kristo Habu! 12Ara inna hituhuti neleiso iso da hatai, errumu iso itai lodole lobubuna da boŋojin lelefer do togoli hitimhati na hanyahanya.”

13Kokuak owuon ifa iluluŋ no oseŋer ille ido ille etihabuo Hollum ette hijo, 14“Hotohuo Hollum lie to hide, hotowuana hidofe himora da fau to hiji ho huwo illo omuno inyie.”

15Aŋawoŋ holoŋ nafa ofuye anjillohien tere hose ahide ido, ette heyohok hiro do kkwaite innohosie, “Ŋaifie iyane a Bettelehem, anyar efuo ŋegonyu sehin nara leba nelehumak Habu hetteyen iyohooi.” 16Aruhari isieja ade ette ŋarrumu Maria iko Yosefu, egonyu isia lodole lefer do togoli imhatit.

17Ifa legonyu isieja inna, elimak isieja do huwo hirro daŋ innafa ojo huwo to lodole lie. 18Eliliha illafa letiru daŋ do hirro innafa elimak heyohok isieja daŋ. 19Hati arrasa ifa Mariya higigillo hirrro innafa etiru ho innafa lotunak inyie da taji honyie. 20Aŋacohini heyokok, ille etahuo ojo hidofe etihabuo Hollum to hirro innafa etiru ho nuhe innafa egonyu isieja, iya nafa ero huwo do hosie.

21Nafa lera far hitahotohunihi noholoŋ, era ifa far no ŋoto no lodole, ette efurek inyeja Yesu, fure nafa eiso anjillo holobe ifa etiyodik do hosehe.

22Nafa lelaŋ holoŋitek inno hitilibo, iya lojo hifahi no Musa, eyani Yosefu iko Mariya hito lie hosie lodole efahak ahide Haji Imojit no Hollum to Yerusalem hesiarari inyeja da Habu. 23Iya nafa legioroi do hotuai ho hifahi no Habu; “Durre lewa loŋeuha ille lesiuni hesiara isieja daŋ da Habu.” 24Afanu hidofe isieja hiso ibulucita iya nafa oji huwo do hotuai ho hifahi na Habu, “Turet illo wolo kuya lohorik illo lodicio illo hamami.”

25Ihuma riŋa, owuon ifa lobo tiŋoni do Yerusalm fure nohonyie Simiona. Obis ifa tihoni ille ojo hidofe eiso wan de igem. Etila ifa inyeja itiliha no tajia inno huwo ille Israile. Ojo ifa Loholio Lolibo owuon iko inyeja. 26Etuhutek ifa anjillo Lolibo dohonyie ette hijo, obe iso inyeja oye holobe inyeja egonyu Habu Yesu Kristo.

27Da nabo far ottu ifa inyeja ahotue Haji Imojit nyo Loholio ifa eyani inyeja de. Nafa eyani hesiok hito, Yesu hehumari te inyeja iya lojo imohit no hifahi. 28Ette Simiona ŋamojok inyeja da has honyie, etahuo ette hijo, 29“Iyane isiara hegiamani lohoi hotopiahari bolioŋ, Habu iya eijo iye.

30Aŋegonyu honyiehite hanaŋ hetilahani lohoi, 31Inne ediarak iye do honyiehite inno huwo daŋ. 32Ara iso inyeja calai letuhuta hilahode do Gentails ojo iso lohuo lo huwo illohoi Israile.”

33Omunoi ifa monye ho hotonye hito ette hililiha do hirro innafa ero te inyie. 34Ette Simiona hijok isieja ette hijo do Mariya hotonye hito, “Itira na lanyar! Eyani iso hito le ŋahuye ho diote no huwo illo Israile aria, ojo hidofe hituhuti no lottu wuana. 35Hidofe, ocuk iso demi Oholio nohonyie, hijo anyar asalak higigilita inna tajia.”

36Owuon hidofe nabo hekilani de nara fure Anna. Ara ifa inyeja ŋani Fanuel to woyo no Aser. Emaruak ifa inyeja binno. Amanya ifa isieja ho lolewa honyie ŋasi hetterik ija da yama nohosie ette lolewa honyie yei. 37Ette inyeja hira ihidak ŋasi tomuana hotohunik ha aŋwan. Oduloi ifa inyeja manya de Ikelesia etihabuo Hollum to hiya ho mojo ta far ho harie. 38Da far nyie, ottu ifa inyeja do hosie ette hitira, esiara humo do Hollum. Ero inyeja do huwo daŋ te hiram no hito to hitila nohosie etillohini no Yerusalem.

39Ifa leisohak isieja higem hirro daŋ iya lojo Ifahita inno Habu Hollum, ette isieja ŋacohari a Galileya bore gala nohosie, Nasaret. 40Ifa lobolo hito, owuSon ho golon, no kwan, obolo ofioro, owuon ifa agarasia no Hollum do honyie.

41Olot ifa Mariya ho Yosefu ŋasi daŋ a Yerusalem do huwom no Laŋan. 42Nafa era ŋasi innohonyie tomon harik, ofuo ifa isieja huwom iya ara imohit nohosie. 43Ifa latohu isieja holoŋitek inno huwom, ette isieja ŋacohari a haŋ. 44Hati arrasa ifa Yesu da halu do Yerusalem ojo Mariya ho Yosefu lobe loyien. Egigillo ifa isieja owuon mahu ho iluluŋ nafa ohu hose, olot ifa isieja fa naboite. Ette isieja hitiara siaha inyeja de hiji ho woyo ho morot.

45Ifa lobe isieja lorrumu inyeja, ette ŋacohari a Yerusalem losiehari inyeja de. 46Da halu ho holoŋitek hunik, ette isieja ŋarrumu do hotuai he Ikelesia, leletole de hiji hetiyanak, letira do hosie ojo lefifia isieja. 47Eliliha illafa etiru lofioroho ho hitiraŋita innohonyie.

48Ifa ewolo Mariya ho Yosefu inyeja, ette isieja hililiha. Ette hotonye honyie hijo do honyie, “Hito, nyo lihum iye iyohoi aniaŋ Itira, osiaha monye hoi ha naŋ iye binno.” 49Ette inyeja hijo do hosie, “Isiaha itai naŋ ano nyo Ibe itai liyen hijo anyar awuon naŋ da haji ho Monye hanaŋ?” 50Hati obe ifa isieja leriamik hiyen hirro inne lero inyeja.

51Niya, ette inyeja ŋacohari daŋ he isieja ahaŋ a Nasaret ette hitira do hosie. Ottunak ifa hotonye honyie hirro inne daŋ ta taji honyie. Hati obobolori ifa Yesu to lofioroho, to kwan ojo to mune nohonyie ho Hollum ho Huwo.

52